apne hathon se bana kar kashtiyan barish ki sham

apne hāthoñ se banā kar kashtiyāñ bārish kī shaam

maiñ ne paanī meñ bahā diiñ chiTThiyāñ bārish kī shaam

dil ke daftar meñ vo manzar aaj bhī mahfūz hai

garm coffē balcony sardiyāñ bārish kī shaam

ro ke dil kī Tahniyoñ par aise aaya hai shabāb

jis tarah bhīgī huī hoñ laḌkiyāñ bārish kī shaam

raqs meñ hai qasr-e-shāhī jashn hai barsāt kā

kyā kareñ kachche gharoñ kī bastiyāñ bārish kī shaam

jis qadar ye āsmāñ royā maiñ royā us qadar

dhul ga.iiñ sab dil-shajar kī Tahniyāñ bārish kī shaam

yaad aatī haiñ mujhe aksar dayār-e-ġhair meñ

maañ kī mamtā bājre kī roTiyāñ bārish kī shaam

saarī galiyāñ saare kūche saare dar sunsān haiñ

aur haiñ ābād saarī khiḌkiyāñ bārish kī shaam

apne hathon se bana kar kashtiyan barish ki sham

main ne pani mein baha din chiTThiyan barish ki sham

dil ke daftar mein wo manzar aaj bhi mahfuz hai

garm coffee balcony sardiyan barish ki sham

ro ke dil ki Tahniyon par aise aaya hai shabab

jis tarah bhigi hui hon laDkiyan barish ki sham

raqs mein hai qasr-e-shahi jashn hai barsat ka

kya karen kachche gharon ki bastiyan barish ki sham

jis qadar ye aasman roya main roya us qadar

dhul gain sab dil-shajar ki Tahniyan barish ki sham

yaad aati hain mujhe aksar dayar-e-ghair mein

man ki mamta bajre ki roTiyan barish ki sham

sari galiyan sare kuche sare dar sunsan hain

aur hain aabaad sari khiDkiyan barish ki sham