apne har dard ka darman banae rakkha

apne har dard kā darmān banā.e rakkhā

ġham ik aisā thā ki siine se lagā.e rakkhā

pās-e-nāmūs-e-masīhā thā mujhe dar-parda

zaḳhm-e-jāñ-soz ko marham se bachā.e rakkhā

ek andesha-e-nā-qadrī-e-'ālam ne mujhe

'umr bhar chashm-e-zamāna se chhupā.e rakkhā

kabhī jaane na diyā ghar kā añdherā bāhar

ik diyā maiñ ne darīche meñ jalā.e rakkhā

dekh kar barhana-pā raah ke kāñToñ ne mujhe

rashk-e-gulshan mire raste ko banā.e rakkhā

asl kirdār tamāshe ke vahī log to the

vaqt ne jin ko tamāshā.ī banā.e rakkhā

dekh saktā thā bahut duur tak aage maiñ 'zahīr'

jab tak in shānoñ pe bachchoñ ko uThā.e rakkhā

apne har dard ka darman banae rakkha

gham ek aisa tha ki sine se lagae rakkha

pas-e-namus-e-masiha tha mujhe dar-parda

zaKHm-e-jaan-soz ko marham se bachae rakkha

ek andesha-e-na-qadri-e-'alam ne mujhe

'umr bhar chashm-e-zamana se chhupae rakkha

kabhi jaane na diya ghar ka andhera bahar

ek diya main ne dariche mein jalae rakkha

dekh kar barhana-pa rah ke kanTon ne mujhe

rashk-e-gulshan mere raste ko banae rakkha

asl kirdar tamashe ke wahi log to the

waqt ne jin ko tamashai banae rakkha

dekh sakta tha bahut dur tak aage main 'zahir'

jab tak in shanon pe bachchon ko uThae rakkha