apne hi ghar mein yun hai mujhe apne ghar ki qaid

apne hī ghar meñ yuuñ hai mujhe apne ghar kī qaid

darkār jaise chhat ko ho dīvār-o-dar kī qaid

yuuñ zindagī ke saath rahī umr bhar kī qaid

lāzim ho jaise bahr-nazāra nazar kī qaid

āzād ho ke apnā asar DhūñDhtī phire

manzūr gar nahīñ hai duā ko asar kī qaid

is dahr ke azal se ye lail-o-nahār haiñ

sūraj ko din kī chāñd ko hai rāt-bhar kī qaid

āzād haiñ parind to parvāz ke liye

ye to batāo hai ki nahīñ bāl-o-par kī qaid

ai saaz kyuuñ na maut ko āvāz dījiye

gar aap ko qubūl nahīñ umr-bhar kī qaid

apne hi ghar mein yun hai mujhe apne ghar ki qaid

darkar jaise chhat ko ho diwar-o-dar ki qaid

yun zindagi ke sath rahi umr bhar ki qaid

lazim ho jaise bahr-nazara nazar ki qaid

aazad ho ke apna asar DhunDhti phire

manzur gar nahin hai dua ko asar ki qaid

is dahr ke azal se ye lail-o-nahaar hain

suraj ko din ki chand ko hai raat-bhar ki qaid

aazad hain parind to parwaz ke liye

ye to batao hai ki nahin baal-o-par ki qaid

ai saz kyun na maut ko aawaz dijiye

gar aap ko qubul nahin umr-bhar ki qaid