apne hi kisi KHwab se bahar nahin nikle

apne hī kisī ḳhvāb se bāhar nahīñ nikle

vo aks jo tālāb se bāhar nahīñ nikle

ham vasl kī jhilmil se nikal aa.e the lekin

hijrāñ kī tab-o-tāb se bāhar nahīñ nikle

is shahr ke sāhil pe tamāshā to dikhātā

beḌe mere girdāb se bāhar nahīñ nikle

marte rahe jugnū mirī tārīk galī ke

tum halqa-e-mahtāb se bāhar nahīñ nikle

kuchh shauq jo āñkhoñ se chhalakte haiñ abhī tak

kuchh ḳhauf jo a.asāb se bāhar nahīñ nikle

apne hi kisi KHwab se bahar nahin nikle

wo aks jo talab se bahar nahin nikle

hum wasl ki jhilmil se nikal aae the lekin

hijran ki tab-o-tab se bahar nahin nikle

is shahr ke sahil pe tamasha to dikhata

beDe mere girdab se bahar nahin nikle

marte rahe jugnu meri tarik gali ke

tum halqa-e-mahtab se bahar nahin nikle

kuchh shauq jo aankhon se chhalakte hain abhi tak

kuchh KHauf jo aasab se bahar nahin nikle