apne kahte hain koi baat to dukh hota hai

apne kahte haiñ koī baat to dukh hotā hai

hans ke karte haiñ ishārāt to dukh hotā hai

jin se mansūb mire dil kī har ik dhaḌkan ho

vo na samjheñ mire jazbāt to dukh hotā hai

mujh ko mahrūm kiyā tum ne gilā koī nahīñ

hoñ jo ġhairoñ pe ināyāt to dukh hotā hai

jism-o-jāñ jin ke liye ham ne luTā Daale huuñ

chhoḌ jaa.eñ jo vahī saath to dukh hotā hai

duur se roz-e-masarrat kā dikhā kar bādal

ġham kī karte haiñ jo barsāt to dukh hotā hai

hijr meñ din to kisī taur guzar jaate haiñ

jalne lagtī hai kabhī raat to dukh hotā hai

be-sabab chhoḌ diyā us ne koī baat nahīñ

log karte haiñ savālāt to dukh hotā hai

mujh ko be-laus mohabbat ke evaz meñ 'shamsī'

ho atā zaḳhm kī sauġhāt to dukh hotā hai

apne kahte hain koi baat to dukh hota hai

hans ke karte hain ishaaraat to dukh hota hai

jin se mansub mere dil ki har ek dhaDkan ho

wo na samjhen mere jazbaat to dukh hota hai

mujh ko mahrum kiya tum ne gila koi nahin

hon jo ghairon pe inayat to dukh hota hai

jism-o-jaan jin ke liye hum ne luTa Dale hun

chhoD jaen jo wahi sath to dukh hota hai

dur se roz-e-masarrat ka dikha kar baadal

gham ki karte hain jo barsat to dukh hota hai

hijr mein din to kisi taur guzar jate hain

jalne lagti hai kabhi raat to dukh hota hai

be-sabab chhoD diya us ne koi baat nahin

log karte hain sawalat to dukh hota hai

mujh ko be-laus mohabbat ke ewaz mein 'shamsi'

ho ata zaKHm ki saughat to dukh hota hai