apne kashkol mein wo shams-o-qamar rakhte hain

apne kashkol meñ vo shams-o-qamar rakhte haiñ

jo qalandar haiñ zamāne kī ḳhabar rakhte haiñ

manzileñ un hī ke hamrāh chalā kartī haiñ

apne siine meñ jo allāh kā Dar rakhte haiñ

nusrateñ un ke qadam chūmtī rahtī haiñ sadā

hai jo dīvāne kahāñ raḳht-e-safar rakhte haiñ

azm ke buute pe uḌte haiñ bulandī kī taraf

par nahīñ quvvat-e-parvāz magar rakhte haiñ

ham ne ajdād se virse meñ ye paayā hai hunar

ham samundar ke tamāshoñ pe nazar rakhte haiñ

bāñdh lete haiñ bamoñ ko bhī shikam se apne

dil hai faulād ke lohe kā jigar rakhte haiñ

in sharīfoñ ko tū buzdil na samajhnā 'sābir'

tank aur top chalāne kā hunar rakhte haiñ

apne kashkol mein wo shams-o-qamar rakhte hain

jo qalandar hain zamane ki KHabar rakhte hain

manzilen un hi ke hamrah chala karti hain

apne sine mein jo allah ka Dar rakhte hain

nusraten un ke qadam chumti rahti hain sada

hai jo diwane kahan raKHt-e-safar rakhte hain

azm ke bute pe uDte hain bulandi ki taraf

par nahin quwwat-e-parwaz magar rakhte hain

hum ne ajdad se wirse mein ye paya hai hunar

hum samundar ke tamashon pe nazar rakhte hain

bandh lete hain bamon ko bhi shikam se apne

dil hai faulad ke lohe ka jigar rakhte hain

in sharifon ko tu buzdil na samajhna 'sabir'

tank aur top chalane ka hunar rakhte hain