apne lail-o-nahaar ki baaten

apne lail-o-nahār kī bāteñ

jabr kī iḳhtiyār kī bāteñ

har taraf kab se ho rahī haiñ yahāñ

gardish-e-rozgār kī bāteñ

chār-sū yaañ pe maujzan haiñ sarāb

ziist ke regzār kī bāteñ

ik zamāna guzar gayā yūñhī

ham haiñ aur dasht-e-ḳhār kī bāteñ

is kaḌī dhuup meñ mazāhib meñ

shajar-e-sāya-dār kī bāteñ

hai zamīñ saḳht āsmāñ chup hai

vaah re parvar-digār kī bāteñ

jis kī ik bhī jhalak na dekhī kabhī

kyā hoñ us parda-dār kī bāteñ

mat karo be-hisār kī bāteñ

mat karo be-kanār kī bāteñ

ye jo pyārī zamīñ milī hai tumheñ

bas karo is dayār kī bāteñ

gar karo apne dil kī baat karo

haañ isī sogvār kī bāteñ

apne lail-o-nahaar ki baaten

jabr ki iKHtiyar ki baaten

har taraf kab se ho rahi hain yahan

gardish-e-rozgar ki baaten

chaar-su yan pe maujzan hain sarab

zist ke regzar ki baaten

ek zamana guzar gaya yunhi

hum hain aur dasht-e-KHar ki baaten

is kaDi dhup mein mazahib mein

shajar-e-saya-dar ki baaten

hai zamin saKHt aasman chup hai

wah re parwar-digar ki baaten

jis ki ek bhi jhalak na dekhi kabhi

kya hon us parda-dar ki baaten

mat karo be-hisar ki baaten

mat karo be-kanar ki baaten

ye jo pyari zamin mili hai tumhein

bas karo is dayar ki baaten

gar karo apne dil ki baat karo

han isi sogwar ki baaten