apne mazi ke nuqush aur guzishta kar ke

apne maazī ke nuqūsh aur guzishta kar ke

lauT aaya huuñ tamanna meñ izāfa kar ke

zehn ke vāste kartā huuñ ujāloñ kī talāsh

apne kamre meñ har ik samt añdherā kar ke

lafz-dar-lafz chukāyā hai ma.ānī kā ḳhirāj

apne alfāz ko kuchh aur shagufta kar ke

fikr kī shakl ko kāġhaz pe utārūñgā kabhī

zehn meñ uThte ḳhayāloñ kā ahāta kar ke

hausloñ ko na.ī parvāz yaqīnan miltī

tum ne dekhā hī nahīñ ḳhud ko shikasta kar ke

talḳh yādeñ bhī to hotī haiñ bahar-hāl azaab

is liye rakhtā nahīñ un kā zaḳhīra kar ke

ghar ke darvāze pe ā.īna lagā kar aksar

dekhtā rahtā huuñ logoñ kā tamāsha kar ke

tajrabe sher kī le leñge na.ī shakl abhī

soch kā dā.era dekho to kushāda kar ke

jaan lenā ke tumhārā vo nahīñ thā 'bismil'

us ko jaane do jo jaatā hai bahānā kar ke

apne mazi ke nuqush aur guzishta kar ke

lauT aaya hun tamanna mein izafa kar ke

zehn ke waste karta hun ujalon ki talash

apne kamre mein har ek samt andhera kar ke

lafz-dar-lafz chukaya hai maani ka KHiraj

apne alfaz ko kuchh aur shagufta kar ke

fikr ki shakl ko kaghaz pe utarunga kabhi

zehn mein uThte KHayalon ka ahata kar ke

hauslon ko nai parwaz yaqinan milti

tum ne dekha hi nahin KHud ko shikasta kar ke

talKH yaaden bhi to hoti hain bahar-haal azab

is liye rakhta nahin un ka zaKHira kar ke

ghar ke darwaze pe aaina laga kar aksar

dekhta rahta hun logon ka tamasha kar ke

tajrabe sher ki le lenge nai shakl abhi

soch ka daera dekho to kushada kar ke

jaan lena ke tumhaara wo nahin tha 'bismil'

us ko jaane do jo jata hai bahana kar ke