apne mohsin se dagha karna bataya bhi nahin

apne mohsin se daġhā karnā batāyā bhī nahīñ

ye hunar mujh ko buzurgoñ ne sikhāyā bhī nahīñ

muddatoñ baa'd milā thā vo magar haal mirā

us ne pūchhā bhī nahīñ maiñ ne batāyā bhī nahīñ

koī behis kabhī tauqīr ke qābil jo huā

aise kam-zarf se muñh maiñ ne lagāyā bhī nahīñ

vaqt ne mujh ko ye mohlat hī na dī ḳhvāb bunūñ

aur āñkhoñ ne koī ḳhvāb dikhāyā bhī nahīñ

ghar paḌosī kā jale aur na ho dukh mujh ko

jhol aisā mire kirdār meñ aaya bhī nahīñ

yuuñ to qismat ke navishte meñ bulandī thī magar

maiñ ne sar apnā kisī dar pe jhukāyā bhī nahīñ

shohrateñ mere ta'āqub meñ rahīñ laakh 'atīq'

aaj tak maiñ ne unheñ ḳhud se milāyā bhī nahīñ

apne mohsin se dagha karna bataya bhi nahin

ye hunar mujh ko buzurgon ne sikhaya bhi nahin

muddaton ba'd mila tha wo magar haal mera

us ne puchha bhi nahin main ne bataya bhi nahin

koi behis kabhi tauqir ke qabil jo hua

aise kam-zarf se munh main ne lagaya bhi nahin

waqt ne mujh ko ye mohlat hi na di KHwab bunun

aur aankhon ne koi KHwab dikhaya bhi nahin

ghar paDosi ka jale aur na ho dukh mujh ko

jhol aisa mere kirdar mein aaya bhi nahin

yun to qismat ke nawishte mein bulandi thi magar

main ne sar apna kisi dar pe jhukaya bhi nahin

shohraten mere ta'aqub mein rahin lakh 'atiq'

aaj tak main ne unhen KHud se milaya bhi nahin