apne partaw hi mein Khaaliq ne banaya hai mujhe

apne partav hī meñ ḳhāliq ne banāyā hai mujhe

zo'm-e-dārā.ī isī vaj.h se aayā hai mujhe

kis kā ġham huuñ ki mashiyyat ne manāyā hai mujhe

kis kā dil huuñ ki do-‘ālam se lagāyā hai mujhe

mahv-e-hairat hai tirī sho’bada-bāzī par dil

ye banāyā hai ki is taur miTāyā hai mujhe

yaas aur aas kā ik soz-bharā naġhma huuñ

sāz-e-ehsās pe armānoñ ne gaayā hai mujhe

chand lamhāt kī sat.hī sī masarrat ke liye

laal angāroñ pe ḳhvāhish ne nachāyā hai mujhe

hasrat-o-ranj ho yā ‘ishrat-o-sar-mastī ho

ek hī rang meñ ahbāb ne paayā hai mujhe

dam to lene do zarā Thahro bhayānak sapno

thapkiyāñ de ke umīdoñ ne sulāyā hai mujhe

sāhabo kū-e-malāmat meñ nadāmat kaisī

shauq-e-rusvā.ī yahāñ khīñch ke laayā hai mujhe

dil kahe maiñ huuñ fasurda mirā hañsnā mā'lūm

vo ḳharāba huuñ ki hasrat ne basāyā hai mujhe

roz-o-shab phirtā huuñ āshufta-sar-o-āvāra

is qadar terī mohabbat ne satāyā hai mujhe

āñkheñ chanchal haiñ magar man hai mirā bairāgī

'krishn-mohan' ye milan moh kī maayā hai mujhe

apne partaw hi mein KHaliq ne banaya hai mujhe

zo'm-e-darai isi wajh se aaya hai mujhe

kis ka gham hun ki mashiyyat ne manaya hai mujhe

kis ka dil hun ki do-‘alam se lagaya hai mujhe

mahw-e-hairat hai teri sho’bada-bazi par dil

ye banaya hai ki is taur miTaya hai mujhe

yas aur aas ka ek soz-bhara naghma hun

saz-e-ehsas pe armanon ne gaya hai mujhe

chand lamhat ki sathi si masarrat ke liye

lal angaron pe KHwahish ne nachaya hai mujhe

hasrat-o-ranj ho ya ‘ishrat-o-sar-masti ho

ek hi rang mein ahbab ne paya hai mujhe

dam to lene do zara Thahro bhayanak sapno

thapkiyan de ke umidon ne sulaya hai mujhe

sahabo ku-e-malamat mein nadamat kaisi

shauq-e-ruswai yahan khinch ke laya hai mujhe

dil kahe main hun fasurda mera hansna ma'lum

wo KHaraba hun ki hasrat ne basaya hai mujhe

roz-o-shab phirta hun aashufta-sar-o-awara

is qadar teri mohabbat ne sataya hai mujhe

aankhen chanchal hain magar man hai mera bairagi

'krishn-mohan' ye milan moh ki maya hai mujhe