apne pindar se ghaT kar nahin qaem rahta

apne pindār se ghaT kar nahīñ qaa.em rahtā

fard kirdār se haT kar nahīñ qaa.em rahtā

'aks baT jaatā hai ā.īnoñ meñ lekin ai dil

aa.ina 'aks meñ baT kar nahīñ qaa.em rahtā

koī bhī naqsh ho kitnā hī mukammal lekin

vaqt kī gard meñ aT kar nahīñ qaa.em rahtā

āsmānoñ meñ uḌānoñ kā maza hogā magar

koī bhī ḳhaak se kaT kar nahīñ qaa.em rahtā

roz ik raah na.ī shauq-e-safar māñgtā hai

dā.eroñ meñ hī simaT kar nahīñ qaa.em rahtā

qita-e-jāñ ko jalātā huā is dhuup kā rañg

chhāñv se terī lipaT kar nahīñ qaa.em rahtā

yaad meñ un kī ka.ī baar bikhar jaatā hai

dil bhī kyā hai ki simaT kar nahīñ qaa.em rahtā

dil vo bachcha ki isī pal meñ humaknā chāhe

ye vo lamha ki palaT kar nahīñ qaa.em rahtā

apne pindar se ghaT kar nahin qaem rahta

fard kirdar se haT kar nahin qaem rahta

'aks baT jata hai aainon mein lekin ai dil

aaina 'aks mein baT kar nahin qaem rahta

koi bhi naqsh ho kitna hi mukammal lekin

waqt ki gard mein aT kar nahin qaem rahta

aasmanon mein uDanon ka maza hoga magar

koi bhi KHak se kaT kar nahin qaem rahta

roz ek rah nai shauq-e-safar mangta hai

daeron mein hi simaT kar nahin qaem rahta

qita-e-jaan ko jalata hua is dhup ka rang

chhanw se teri lipaT kar nahin qaem rahta

yaad mein un ki kai bar bikhar jata hai

dil bhi kya hai ki simaT kar nahin qaem rahta

dil wo bachcha ki isi pal mein humakna chahe

ye wo lamha ki palaT kar nahin qaem rahta