apne qatil ko nigun-sar kiya tha maine

apne qātil ko nigūñ-sār kiyā thā maiñ ne

kār-nāma ye sar-e-dār kiyā thā maiñ ne

mere qabze meñ kisī shaḳhs kī tasvīreñ thiiñ

us ko ik roz ḳhabar-dār kiyā thā maiñ ne

zard-rū thī mirī bāñhoñ meñ vo jab aa.ī thī

chūmte chūmte gulnār kiyā thā maiñ ne

bojh siine se haTāyā thā tirī yādoñ kā

ḳhud pe ehsān-e-girāñ-bār kiyā thā maiñ ne

tū agar jhuuT samajhtī hai to phir jhuuT sahī

sach to ye hai ki tujhe pyaar kiyā thā maiñ ne

ab baḌe faḳhr se kahtā hai masīhā merā

dekh dil ko tire bīmār kiyā thā maiñ ne

yuuñ lagā thā mire jaane kī ḳhushī thii. sab ko

ghar kī dahlīz ko jab paar kiyā thā maiñ ne

vo jo mariyam ke taqaddus kī amiiñ Thahrī thī

āḳhirash us ko havas-kār kiyā thā maiñ ne

cigaretoñ se ġham-e-hijrāñ kī tavāzo' kī thī

saare kamre ko dhuāñ-dhār kiyā thā maiñ ne

mudda'ī jitne the marne ke bhagoḌe nikle

hausla teġh-e-sitamgār kiyā thā maiñ ne

maiñ jahāñ ḳhuun meñ nahlāyā gayā huuñ 'yāvar'

us galī ko kabhī gulzār kiyā thā maiñ ne

apne qatil ko nigun-sar kiya tha main ne

kar-nama ye sar-e-dar kiya tha main ne

mere qabze mein kisi shaKHs ki taswiren thin

us ko ek roz KHabar-dar kiya tha main ne

zard-ru thi meri banhon mein wo jab aai thi

chumte chumte gulnar kiya tha main ne

bojh sine se haTaya tha teri yaadon ka

KHud pe ehsan-e-giran-bar kiya tha main ne

tu agar jhuT samajhti hai to phir jhuT sahi

sach to ye hai ki tujhe pyar kiya tha main ne

ab baDe faKHr se kahta hai masiha mera

dekh dil ko tere bimar kiya tha main ne

yun laga tha mere jaane ki KHushi thi sab ko

ghar ki dahliz ko jab par kiya tha main ne

wo jo mariyam ke taqaddus ki amin Thahri thi

aaKHirash us ko hawas-kar kiya tha main ne

cigareton se gham-e-hijran ki tawazo' ki thi

sare kamre ko dhuan-dhaar kiya tha main ne

mudda'i jitne the marne ke bhagoDe nikle

hausla tegh-e-sitamgar kiya tha main ne

main jahan KHun mein nahlaya gaya hun 'yawar'

us gali ko kabhi gulzar kiya tha main ne