apne sine mein dabae hue gham rakkha hai

apne siine meñ dabā.e hue ġham rakkhā hai

ham ne har haal meñ ulfat kā bharam rakkhā hai

tujh se duurī kā na ehsās kabhī ho mujh ko

dil meñ yādoñ ko tirī yūñhī sanam rakkhā hai

dekh le ek nazar dam to sukūñ se nikle

tere bīmār kā aTkā huā dam rakkhā hai

rab kī marzī ke binā hotā nahīñ hai kuchh bhī

us ne har shaḳhs ko mohtāj-e-karam rakkhā hai

tū hameñ yaad kare yā na kare par ham ne

har ghaḌī yaad tujhe terī qasam rakkhā hai

ham ko talvār kī pesh aatī zarūrat kaise

jeb meñ ham ne hama-vaqt qalam rakkhā hai

maiñ samajhtā huuñ ki sab soch samajh kar 'faisal'

tum ne dahlīz-e-mohabbat pe qadam rakkhā hai

apne sine mein dabae hue gham rakkha hai

hum ne har haal mein ulfat ka bharam rakkha hai

tujh se duri ka na ehsas kabhi ho mujh ko

dil mein yaadon ko teri yunhi sanam rakkha hai

dekh le ek nazar dam to sukun se nikle

tere bimar ka aTka hua dam rakkha hai

rab ki marzi ke bina hota nahin hai kuchh bhi

us ne har shaKHs ko mohtaj-e-karam rakkha hai

tu hamein yaad kare ya na kare par hum ne

har ghaDi yaad tujhe teri qasam rakkha hai

hum ko talwar ki pesh aati zarurat kaise

jeb mein hum ne hama-waqt qalam rakkha hai

main samajhta hun ki sab soch samajh kar 'faisal'

tum ne dahliz-e-mohabbat pe qadam rakkha hai