apne upar zulm karunga ulTa sidha sochunga

apne uupar zulm karūñgā ulTā sīdhā sochūñgā

jab tak hosh rahegā mujh ko saarī duniyā sochūñgā

sukh-dukh se haT kar insāñ ko aur bhalā jiinā kyā hai

bāñdh ke rātoñ ke dāman se dhuup sarāpā sochūñgā

ek haath meñ pyāsī rāteñ ek haath meñ bhīge din

achchhe din jab kho jā.eñge burā burā sā sochūñgā

jī kartā hai shīsha ban kar maiñ us se Takrā jā.ūñ

vo patthar-dil rah-e-talab meñ patthar kab thā sochūñgā

kā.enāt kā zarra zarra ḳhud chehra ḳhud ā.īna

āñkheñ jitnī saath raheñgī ḳhud ko utnā sochūñgā

raushan ghar raushan añgnā.ī raushan din raushan rāteñ

un ke biich mirā dil kyoñ hai itnā dhuñdlā sochūñgā

behtar hai bas apnī gahrā.ī meñ jā kar baiTh rahūñ

aur bikhar jā.ūñgā shāyad tum ko jitnā sochūñgā

vaqt bhī kab se bhaag rahā hai apne markaz kī jānib

mere saath rahegā kab tak koī apnā sochūñgā

yuuñ bhī rāh-e-fikr-o-nazar meñ jīvan bhar bhaTkā 'parvāz'

apnī gumrāhī kā ye ġham āḳhir kitnā sochūñgā

apne upar zulm karunga ulTa sidha sochunga

jab tak hosh rahega mujh ko sari duniya sochunga

sukh-dukh se haT kar insan ko aur bhala jina kya hai

bandh ke raaton ke daman se dhup sarapa sochunga

ek hath mein pyasi raaten ek hath mein bhige din

achchhe din jab kho jaenge bura bura sa sochunga

ji karta hai shisha ban kar main us se Takra jaun

wo patthar-dil rah-e-talab mein patthar kab tha sochunga

kaenat ka zarra zarra KHud chehra KHud aaina

aankhen jitni sath rahengi KHud ko utna sochunga

raushan ghar raushan angnai raushan din raushan raaten

un ke bich mera dil kyon hai itna dhundla sochunga

behtar hai bas apni gahrai mein ja kar baiTh rahun

aur bikhar jaunga shayad tum ko jitna sochunga

waqt bhi kab se bhag raha hai apne markaz ki jaanib

mere sath rahega kab tak koi apna sochunga

yun bhi rah-e-fikr-o-nazar mein jiwan bhar bhaTka 'parwaz'

apni gumrahi ka ye gham aaKHir kitna sochunga