apni aag mein bhunti jae bunti jae kafan apna

apnī aag meñ bhuntī jaa.e buntī jaa.e kafan apnā

goyā isī liye chhoḌā hai chingārī ne vatan apnā

jhoñke kuchh be-jān havā ke aate haiñ apne-āp chale

jhuum uThte haiñ chaman ke pañkhe us ko jaan ke fan apnā

ḳhud-rav sabze chheḌ rahe haiñ jangal ke qānūn ke raag

kab tak baaġh meñ paḌhvā.eñge ḳhutba sarv-o-saman apnā

dariyā-dil hai sāhil merā magar yahāñ har sail-e-balā

saa.il hai ki baḌhā aatā hai phailā.e dāman apnā

mil to jaa.e apne bhañvar ko dariyā ke chakkar se najāt

lekin aah agar rah jā.ūñ ho kar maiñ hama-tan apnā

sham' kī lau kyā shauq-e-baqā meñ sham' ko chāTe jaatī hai

ḳhud ko tarastī rah jaatī hai ruuh miTā ke badan apnā

koī 'muhib' āzurda kyuuñ ho merī talḳh-kalāmī se

apnī hī jānib rahtā hai aksar rū-e-suḳhan apnā

apni aag mein bhunti jae bunti jae kafan apna

goya isi liye chhoDa hai chingari ne watan apna

jhonke kuchh be-jaan hawa ke aate hain apne-ap chale

jhum uThte hain chaman ke pankhe us ko jaan ke fan apna

KHud-raw sabze chheD rahe hain jangal ke qanun ke rag

kab tak bagh mein paDhwaenge KHutba sarw-o-saman apna

dariya-dil hai sahil mera magar yahan har sail-e-bala

sail hai ki baDha aata hai phailae daman apna

mil to jae apne bhanwar ko dariya ke chakkar se najat

lekin aah agar rah jaun ho kar main hama-tan apna

sham' ki lau kya shauq-e-baqa mein sham' ko chaTe jati hai

KHud ko tarasti rah jati hai ruh miTa ke badan apna

koi 'muhib' aazurda kyun ho meri talKH-kalami se

apni hi jaanib rahta hai aksar ru-e-suKHan apna