apni aaghosh-e-faraghat mein paDa rahta hun

apnī āġhosh-e-farāġhat meñ paḌā rahtā huuñ

vaqt itnā hai ki hairat meñ paḌā rahtā huuñ

aa batātā huuñ tujhe kitnī hasīñ hai duniyā

maiñ jahāñ terī mohabbat meñ paḌā rahtā huuñ

tū mujhe jāntā hai aur bahut jāntā hai

bas isī nashsha-e-shohrat meñ paḌā rahtā huuñ

tujh se milne kā bhī imkān ziyāñ lagtā hai

jaane kis 'ālam-e-vahshat meñ paḌā rahtā huuñ

jārī-o-sārī hai bas ek tamanna kā tavāf

raat din hujra-e-hasrat meñ paḌā rahtā huuñ

haath apne nahīñ baḌhte kisī ḳhvāhish kī taraf

ḳhaak uḌtī hai to ḳhalvat meñ paḌā rahtā huuñ

mujh ko bāñdhā hai kisī shaam kī raqqāsa ne

surma.ī husn kī chāhat meñ paḌā rahtā huuñ

jism kī jāgtī duniyā meñ añdherā kar ke

maiñ ki bas ruuh kī dahshat meñ paḌā rahtā huuñ

apni aaghosh-e-faraghat mein paDa rahta hun

waqt itna hai ki hairat mein paDa rahta hun

aa batata hun tujhe kitni hasin hai duniya

main jahan teri mohabbat mein paDa rahta hun

tu mujhe jaanta hai aur bahut jaanta hai

bas isi nashsha-e-shohrat mein paDa rahta hun

tujh se milne ka bhi imkan ziyan lagta hai

jaane kis 'alam-e-wahshat mein paDa rahta hun

jari-o-sari hai bas ek tamanna ka tawaf

raat din hujra-e-hasrat mein paDa rahta hun

hath apne nahin baDhte kisi KHwahish ki taraf

KHak uDti hai to KHalwat mein paDa rahta hun

mujh ko bandha hai kisi sham ki raqqasa ne

surmai husn ki chahat mein paDa rahta hun

jism ki jagti duniya mein andhera kar ke

main ki bas ruh ki dahshat mein paDa rahta hun