apni aankhon ke hisaron se nikal kar dekhna

apnī āñkhoñ ke hisāroñ se nikal kar dekhnā

tū kisī din apne na hone kā manzar dekhnā

ik adam-ma.alūm-muddat se maiñ terī zad meñ huuñ

ḳhud ko lamha bhar mirā qaidī banā kar dekhnā

shaam gahre pāniyoñ meñ Duub kar ek baar phir

shahr ke maujūd manzar ko palaT kar dekhnā

dekhnā pichhle pahar ḳhvāboñ kī ik andhī qatār

āsmāñ par TūTte tāroñ kā manzar dekhnā

merā apne aap se bāhar bikhar jaanā tamām

aur ḳhizāñ-dīda parindoñ kā mirā ghar dekhnā

rañg apne aap hī ab sab ke sab zaa.il hue

hai abas dīvār par ye naqsh-o-paikar dekhnā

maiñ ki ḳhud muztar fasīl-e-jism ke is paar huuñ

kyā bhañvar kā ḳhauf ab kaisā samundar dekhnā

apni aankhon ke hisaron se nikal kar dekhna

tu kisi din apne na hone ka manzar dekhna

ek adam-malum-muddat se main teri zad mein hun

KHud ko lamha bhar mera qaidi bana kar dekhna

sham gahre paniyon mein Dub kar ek bar phir

shahr ke maujud manzar ko palaT kar dekhna

dekhna pichhle pahar KHwabon ki ek andhi qatar

aasman par TuTte taron ka manzar dekhna

mera apne aap se bahar bikhar jaana tamam

aur KHizan-dida parindon ka mera ghar dekhna

rang apne aap hi ab sab ke sab zail hue

hai abas diwar par ye naqsh-o-paikar dekhna

main ki KHud muztar fasil-e-jism ke is par hun

kya bhanwar ka KHauf ab kaisa samundar dekhna