apni aankhon mein hasin KHwab sajae rakkho

apnī āñkhoñ meñ hasīñ ḳhvāb sajā.e rakkho

laakh tūfān uTheñ sham.a jalā.e rakkho

raat phir raat hai ik roz guzar jā.egī

sub.h kī aas azā.em meñ basā.e rakkho

ḳhvāhish-e-dil kī havā tez bahut hai yaaro

aag pindār kī siine meñ jalā.e rakkho

jītnā chāho to har maat saho hañs hañs kar

fikr-e-māyūs ḳhayāloñ se bachā.e rakkho

yuuñ zarā der ko dil se hī lubhā lete haiñ

baat to jab hai ki tā-umr lubhā.e rakkho

tum ne sach bolā hai maslūb tumheñ honā hai

apne kāñdhe pe salīb apnī uThā.e rakkho

gar ye chāho ki ayaañ karb na ho siine kā

jān-e-'shahzād' nigāhoñ se banā.e rakkho

apni aankhon mein hasin KHwab sajae rakkho

lakh tufan uThen shama jalae rakkho

raat phir raat hai ek roz guzar jaegi

subh ki aas azaem mein basae rakkho

KHwahish-e-dil ki hawa tez bahut hai yaro

aag pindar ki sine mein jalae rakkho

jitna chaho to har mat saho hans hans kar

fikr-e-mayus KHayalon se bachae rakkho

yun zara der ko dil se hi lubha lete hain

baat to jab hai ki ta-umr lubhae rakkho

tum ne sach bola hai maslub tumhein hona hai

apne kandhe pe salib apni uThae rakkho

gar ye chaho ki ayan karb na ho sine ka

jaan-e-'shahzad' nigahon se banae rakkho