apni azmat ka nigahban nahin hai koi

apnī azmat kā nigahbān nahīñ hai koī

kyā ab is daur meñ insān nahīñ hai koī

jis taraf dekhiye ishrat kī farāvānī hai

aisā lagtā hai pareshān nahīñ hai koī

jo samajhtā hī na ho haqq-o-sadāqat kyā hai

āj-kal itnā bhī nādān nahīñ hai koī

apnā har aib nazar aatā hai ā.īne meñ

dekh kar phir bhī pashemān nahīñ hai koī

paañv jab rakhiye zamīñ par to rahe dhyān is kā

ḳhaak ke zarroñ meñ be-jān nahīñ hai koī

hausla sāñsoñ se miltā hai to jī letā huuñ

zindagī par mirā ehsān nahīñ hai koī

sab ko ma.alūm hai badlī huī sūrat apnī

aa.ina dekh ke hairān nahīñ hai koī

zindagī ġham meñ basar karnā hai mushkil lekin

muskurā denā bhī āsān nahīñ hai koī

koī kashtī nahīñ mahfūz kināre pe 'la.īq'

jab se dariyāoñ meñ haijān nahīñ hai koī

apni azmat ka nigahban nahin hai koi

kya ab is daur mein insan nahin hai koi

jis taraf dekhiye ishrat ki farawani hai

aisa lagta hai pareshan nahin hai koi

jo samajhta hi na ho haqq-o-sadaqat kya hai

aaj-kal itna bhi nadan nahin hai koi

apna har aib nazar aata hai aaine mein

dekh kar phir bhi pasheman nahin hai koi

panw jab rakhiye zamin par to rahe dhyan is ka

KHak ke zarron mein be-jaan nahin hai koi

hausla sanson se milta hai to ji leta hun

zindagi par mera ehsan nahin hai koi

sab ko malum hai badli hui surat apni

aaina dekh ke hairan nahin hai koi

zindagi gham mein basar karna hai mushkil lekin

muskura dena bhi aasan nahin hai koi

koi kashti nahin mahfuz kinare pe 'laiq'

jab se dariyaon mein haijaan nahin hai koi