apni azmat ko wo miTTi mein mila dete hain

apnī 'azmat ko vo miTTī meñ milā dete haiñ

kar ke ehsān jo ehsān jatā dete haiñ

dil meñ yādoñ ke charāġhoñ ko farozāñ kar ke

ham shab-e-ġham ke añdheroñ ko sazā dete haiñ

jānte haiñ rag-e-har-gul meñ lahū hai merā

phir bhī sāvan meñ mujhe log bhulā dete haiñ

kyā yaqīñ aa.e ki shak bhī nahīñ hotā un par

is salīqe se ka.ī log daġhā dete haiñ

ham to hañs hañs ke chhupāte haiñ har ik ġham ko 'shakīl'

ba.az ġham haiñ jo hañsī meñ bhī rulā dete haiñ

apni 'azmat ko wo miTTi mein mila dete hain

kar ke ehsan jo ehsan jata dete hain

dil mein yaadon ke charaghon ko farozan kar ke

hum shab-e-gham ke andheron ko saza dete hain

jaante hain rag-e-har-gul mein lahu hai mera

phir bhi sawan mein mujhe log bhula dete hain

kya yaqin aae ki shak bhi nahin hota un par

is saliqe se kai log dagha dete hain

hum to hans hans ke chhupate hain har ek gham ko 'shakil'

baz gham hain jo hansi mein bhi rula dete hain