apni har waza har ek Dhang badalne ke liye

apnī har vaz.a har ik Dhang badalne ke liye

kaun aa.egā mire sang badalne ke liye

sab ke lahje meñ vo tabdīliyāñ aa.ī haiñ ki aaj

maiñ bhī majbūr huuñ āhang badalne ke liye

chhoḌ kar jī nahīñ pā.ūñgā maiñ apnī buniyād

kyoñ kare koī mujhe tang badalne ke liye

zikr kyoñ aatā hai us kā mire ahbāb ke saath

jo hai mash.hūr faqat rang badalne ke liye

chand lafzoñ kā asāsa bhī nahīñ jis ke paas

vo bhī āmāda hai farhang badalne ke liye

haath meñ jin ke tarāzū hai nahīñ haiñ tayyār

kisī qīmat pe bhī pāsang badalne ke liye

apnī har chiiz badal bhī nahīñ saktī 'shāhid'

laakh maiñ ḳhud se karūñ jang badalne ke liye

apni har waza har ek Dhang badalne ke liye

kaun aaega mere sang badalne ke liye

sab ke lahje mein wo tabdiliyan aai hain ki aaj

main bhi majbur hun aahang badalne ke liye

chhoD kar ji nahin paunga main apni buniyaad

kyon kare koi mujhe tang badalne ke liye

zikr kyon aata hai us ka mere ahbab ke sath

jo hai mashhur faqat rang badalne ke liye

chand lafzon ka asasa bhi nahin jis ke pas

wo bhi aamada hai farhang badalne ke liye

hath mein jin ke taraazu hai nahin hain tayyar

kisi qimat pe bhi pasang badalne ke liye

apni har chiz badal bhi nahin sakti 'shahid'

lakh main KHud se karun jang badalne ke liye