apni hi aawaz ke qad ke barabar ho gaya

apnī hī āvāz ke qad ke barābar ho gayā

martaba insāñ kā phir bālā-o-bartar ho gayā

dil meñ dar aayā to misl-e-gul mo.attar ho gayā

mere sheroñ kā sarāpā jis kā paikar ho gayā

Dhalte sūraj ne diyā hai kitnī yādoñ ko faroġh

chāñd yuuñ ubhrā ki har zarra ujāgar ho gayā

ab to apne jism ke saa.e se bhī lagtā hai Dar

ghar se bāhar bhī nikalnā ab to dūbhar ho gayā

gūñjtā māhaul vahshī vāhime jañgal safar

uf ye kaalī raat jo merā muqaddar ho gayā

haa.e vo ik ashk jis kī koī manzil hī nahīñ

haa.e vo ik be-zabāñ jo ghar se be-ghar ho gayā

aap se ham kyā kaheñ shahr-e-nigārāñ kā mizāj

jo bhī is māhaul meñ aayā vo patthar ho gayā

kyā huiiñ fikr-o-tasavvur kī tire ra.anā.iyāñ

hādisa aisā bhī kyā 'tanvīr' tum par ho gayā

apni hi aawaz ke qad ke barabar ho gaya

martaba insan ka phir baala-o-bartar ho gaya

dil mein dar aaya to misl-e-gul moattar ho gaya

mere sheron ka sarapa jis ka paikar ho gaya

Dhalte suraj ne diya hai kitni yaadon ko farogh

chand yun ubhra ki har zarra ujagar ho gaya

ab to apne jism ke sae se bhi lagta hai Dar

ghar se bahar bhi nikalna ab to dubhar ho gaya

gunjta mahaul wahshi wahime jangal safar

uf ye kali raat jo mera muqaddar ho gaya

hae wo ek ashk jis ki koi manzil hi nahin

hae wo ek be-zaban jo ghar se be-ghar ho gaya

aap se hum kya kahen shahr-e-nigaran ka mizaj

jo bhi is mahaul mein aaya wo patthar ho gaya

kya huin fikr-o-tasawwur ki tere ranaiyan

hadisa aisa bhi kya 'tanwir' tum par ho gaya