apni kami se puchh na uski kami se puchh

apnī kamī se pūchh na us kī kamī se pūchh

ismat kā bhaav jism kī bechārgī se pūchh

ġhāroñ meñ rahne vāloñ kī shā.istagī kā qad

saḌkoñ pe raqs kartī huī āgahī se pūchh

mujh meñ ye intishār ye nafrat hai kis liye

guzre hue samāj kī dīvāngī se pūchh

Daalī se chhūT jaane kā anjām kyā huā

barg-e-ḳhizāñ-rasīda kī āvārgī se pūchh

ashkoñ meñ iltijāoñ meñ tāqat nahīñ hai kyuuñ

zehnoñ pe raaj kartī huī be-hisī se pūchh

khulne ke intizār meñ jo zard ho ga.ī

rañg-e-sulūk bād-e-sabā us kalī se pūchh

bandoñ ke silsile meñ bahut tū ne kah liyā

allāh apne baare meñ kuchh aadmī se pūchh

apni kami se puchh na us ki kami se puchh

ismat ka bhaw jism ki bechaargi se puchh

ghaaron mein rahne walon ki shaistagi ka qad

saDkon pe raqs karti hui aagahi se puchh

mujh mein ye intishaar ye nafrat hai kis liye

guzre hue samaj ki diwangi se puchh

Dali se chhuT jaane ka anjam kya hua

barg-e-KHizan-rasida ki aawargi se puchh

ashkon mein iltijaon mein taqat nahin hai kyun

zehnon pe raj karti hui be-hisi se puchh

khulne ke intizar mein jo zard ho gai

rang-e-suluk baad-e-saba us kali se puchh

bandon ke silsile mein bahut tu ne kah liya

allah apne bare mein kuchh aadmi se puchh