apni KHwahish ke agar pankh kutarte bante

apnī ḳhvāhish ke agar pañkh kutarte bante

dasht-o-sahrā meñ bhī hamvār ye raste bante

us dil-e-shoḳh kī bas ek nazar hai kaafī

der lagtī nahīñ ehsās ke rishte bante

ā.ina-ḳhāne hī logoñ kā bharam rakhte haiñ

varna har lamhe to chehre na badalte bante

koī to hai jo harāne pe tulā hai mujh ko

baat yūñhī to nahīñ bigḌe hai bante bante

tā-kujā dil ko tasallī pe tasallī dete

tā-kujā rāh-e-tamannā se na chalte bante

garche hotī na mirī ziist kī mub.ham ye kitāb

zindagī sab tire aurāq ye paḌhte bante

sabr kī maat jo hotī to ye hotā 'ārif'

dil ke armān sar-e-rāh kuchalte bante

apni KHwahish ke agar pankh kutarte bante

dasht-o-sahra mein bhi hamwar ye raste bante

us dil-e-shoKH ki bas ek nazar hai kafi

der lagti nahin ehsas ke rishte bante

aaina-KHane hi logon ka bharam rakhte hain

warna har lamhe to chehre na badalte bante

koi to hai jo harane pe tula hai mujh ko

baat yunhi to nahin bigDe hai bante bante

ta-kuja dil ko tasalli pe tasalli dete

ta-kuja rah-e-tamanna se na chalte bante

garche hoti na meri zist ki mubham ye kitab

zindagi sab tere auraq ye paDhte bante

sabr ki mat jo hoti to ye hota 'arif'

dil ke arman sar-e-rah kuchalte bante