apni lau mein koi Duba hi nahin

apnī lau meñ koī Duubā hī nahīñ

chāñd ehsās kā ubhrā hī nahīñ

koī aahaT na koī naqsh-e-qadam

jaise dil se koī guzrā hī nahīñ

chuur ā.īna-e-ayyām bhī hai

merā maazī mirā fardā hī nahīñ

dars maiñ bhī huuñ zamāne ke liye

ek ibrat-gah-e-duniyā hī nahīñ

kitnī sadiyoñ pe rukegā jā kar

ek lamha ki jo biitā hī nahīñ

kitnā hairāñ hai dahān-e-tasvīr

aks āvāz kā utrā hī nahīñ

maiñ bhī thā shahr-e-suḳhan kā me.aar

mere naqqād ne parkhā hī nahīñ

yuuñ chamaktī hai 'samad' kāhkashāñ

jaise taara koī TuuTā hī nahīñ

apni lau mein koi Duba hi nahin

chand ehsas ka ubhra hi nahin

koi aahaT na koi naqsh-e-qadam

jaise dil se koi guzra hi nahin

chur aaina-e-ayyam bhi hai

mera mazi mera farda hi nahin

dars main bhi hun zamane ke liye

ek ibrat-gah-e-duniya hi nahin

kitni sadiyon pe rukega ja kar

ek lamha ki jo bita hi nahin

kitna hairan hai dahan-e-taswir

aks aawaz ka utra hi nahin

main bhi tha shahr-e-suKHan ka mear

mere naqqad ne parkha hi nahin

yun chamakti hai 'samad' kahkashan

jaise tara koi TuTa hi nahin