apni maKHmur nigahon mein chhupa lo mujhko

apnī maḳhmūr nigāhoñ meñ chhupā lo mujh ko

dil kī dahlīz pe chāho to biThā lo mujh ko

har taraf aaj chaman meñ hai ḳhizāñ kī yūrish

dāman-e-sub.h-e-bahārāñ meñ chhupā lo mujh ko

ye mire dil kī hai miTTī ise zaa.e.a na karo

tum se kahtī hai chalo jaam banā lo mujh ko

kabhī gauhar kabhī patthar jo banāyā tum ne

kab kahā maiñ ne ki har sāñche meñ Dhālo mujh ko

maiñ sar-e-rāh paḌā huuñ mujhe Thokar na lagāo

dur-e-nāyāb huuñ siine se lagā lo mujh ko

ishq meñ shauq-e-shahādat kī koī had hī nahīñ

har nafas kahtā hai maqtal meñ bulā lo mujh ko

isī ummīd pe maiñ baiTh gayā huuñ aa kar

rahrav-e-rāh-e-mohabbat huuñ uThā lo mujh ko

āḳhirī iltijā hai aap se sāñsoñ kī mirī

vaqt Dhalne ko hai ab apnā banā lo mujh ko

shab ke dāman meñ 'shafaq' yā to sajā lo mujh ko

sham-e-sozāñ kī tarah yā to jilā lo mujh ko

apni maKHmur nigahon mein chhupa lo mujh ko

dil ki dahliz pe chaho to biTha lo mujh ko

har taraf aaj chaman mein hai KHizan ki yurish

daman-e-subh-e-bahaaran mein chhupa lo mujh ko

ye mere dil ki hai miTTi ise zaea na karo

tum se kahti hai chalo jam bana lo mujh ko

kabhi gauhar kabhi patthar jo banaya tum ne

kab kaha main ne ki har sanche mein Dhaalo mujh ko

main sar-e-rah paDa hun mujhe Thokar na lagao

dur-e-nayab hun sine se laga lo mujh ko

ishq mein shauq-e-shahadat ki koi had hi nahin

har nafas kahta hai maqtal mein bula lo mujh ko

isi ummid pe main baiTh gaya hun aa kar

rahraw-e-rah-e-mohabbat hun uTha lo mujh ko

aaKHiri iltija hai aap se sanson ki meri

waqt Dhalne ko hai ab apna bana lo mujh ko

shab ke daman mein 'shafaq' ya to saja lo mujh ko

sham-e-sozan ki tarah ya to jila lo mujh ko