apni na-karda-gunahi ka sila bhi rakh le

apnī nā-karda-gunāhī kā sila bhī rakh le

dil ke ḳhāne meñ zarā ḳhauf-e-ḳhudā bhī rakh le

tujh ko le jā.egī sannāTe meñ ik roz hayāt

apne kānoñ ke liye sang-e-sadā bhī rakh le

bujh na jaa.e kahīñ ehsās ke sho.aloñ kā mizāj

munjamid vaqt hai thoḌī sī havā bhī rakh le

fāsla aur baḌhā degī anā kī dahlīz

darmiyāñ zīna-e-iḳhlās-e-vafā bhī rakh le

zindagī dasht-e-tilismāt kī jānib hai ravāñ

kuchh to hamrāh buzurgoñ kī duā bhī rakh le

roz kā milnā girāñ-bār-e-ta.alluq na bane

yak-ba-yak is se kabhī ḳhud ko judā bhī rakh le

apni na-karda-gunahi ka sila bhi rakh le

dil ke KHane mein zara KHauf-e-KHuda bhi rakh le

tujh ko le jaegi sannaTe mein ek roz hayat

apne kanon ke liye sang-e-sada bhi rakh le

bujh na jae kahin ehsas ke shoalon ka mizaj

munjamid waqt hai thoDi si hawa bhi rakh le

fasla aur baDha degi ana ki dahliz

darmiyan zina-e-iKHlas-e-wafa bhi rakh le

zindagi dasht-e-tilismat ki jaanib hai rawan

kuchh to hamrah buzurgon ki dua bhi rakh le

roz ka milna giran-bar-e-talluq na bane

yak-ba-yak is se kabhi KHud ko juda bhi rakh le