apni nazir aap rahe hum jahan rahe

apnī nazīr aap rahe ham jahāñ rahe

zor-āzmā agarche zamān-o-makāñ rahe

raste hamāre paañv se lipTe rahe sadā

ham terī justujū hī meñ ai mehrbāñ rahe

jis ko tire huzūr meñ miltī na ho jagah

vo kis ke Dar pe jaa.e vo āḳhir kahāñ rahe

tū ai bahār ham ko miTāne pe tul ga.ī

ham to tamām umr tire rāz-dāñ rahe

is vaqt jab ki log masarrat-navāz the

ham hī ġham-e-habīb tire pāsbāñ rahe

vo paikar-e-ḳhulūs hai vo ārzū-e-dil

ai 'soz' us kā naam hī vird-e-zabāñ rahe

apni nazir aap rahe hum jahan rahe

zor-azma agarche zaman-o-makan rahe

raste hamare panw se lipTe rahe sada

hum teri justuju hi mein ai mehrban rahe

jis ko tere huzur mein milti na ho jagah

wo kis ke Dar pe jae wo aaKHir kahan rahe

tu ai bahaar hum ko miTane pe tul gai

hum to tamam umr tere raaz-dan rahe

is waqt jab ki log masarrat-nawaz the

hum hi gham-e-habib tere pasban rahe

wo paikar-e-KHulus hai wo aarzu-e-dil

ai 'soz' us ka nam hi wird-e-zaban rahe