apni poshak badalne ke liye aae hain

apnī poshāk badalne ke liye aa.e haiñ

ham tirī aag meñ jalne ke liye aa.e haiñ

kaun kahtā hai sañbhalne ke liye aa.e haiñ

ham to sarkār machalne ke liye aa.e haiñ

ham kahīñ aur se aa.e haiñ yahāñ par vaise

aur yaañ se bhī nikalne ke liye aa.e haiñ

vādī-e-gul kā pata pūchhne aa.e haiñ yahāñ

aur yahāñ phūlne-phalne ke liye aa.e haiñ

raat bhar ke liye mil jaa.e Thikāna ham ko

ḳhvāb haiñ aañkh meñ palne ke liye aa.e haiñ

aaj kī raat alaav ke muqābil hoñge

aaj kī raat pighalne ke liye aa.e haiñ

hai ḳhabar garm ki kuchh sar-phire aabī dhāre

regzāroñ meñ ubalne ke liye aa.e haiñ

phir kisī yaad ke āñgan ke chamakte jugnū

merī āñkhoñ meñ machalne ke liye aa.e haiñ

sub.h-dam un kī hai dahlīz pe hāzir honā

raat ke raat nikalne ke liye aa.e haiñ

apni poshak badalne ke liye aae hain

hum teri aag mein jalne ke liye aae hain

kaun kahta hai sanbhalne ke liye aae hain

hum to sarkar machalne ke liye aae hain

hum kahin aur se aae hain yahan par waise

aur yan se bhi nikalne ke liye aae hain

wadi-e-gul ka pata puchhne aae hain yahan

aur yahan phulne-phalne ke liye aae hain

raat bhar ke liye mil jae Thikana hum ko

KHwab hain aankh mein palne ke liye aae hain

aaj ki raat alaw ke muqabil honge

aaj ki raat pighalne ke liye aae hain

hai KHabar garm ki kuchh sar-phire aabi dhaare

regzaron mein ubalne ke liye aae hain

phir kisi yaad ke aangan ke chamakte jugnu

meri aankhon mein machalne ke liye aae hain

subh-dam un ki hai dahliz pe hazir hona

raat ke raat nikalne ke liye aae hain