apni qismat ki lakiron ko ishaara na mila

apnī qismat kī lakīroñ ko ishāra na milā

koī jugnū koī motī koī taarā na milā

jin kā bachpan mirī bāñhoñ meñ hī guzrā thā kabhī

is buḌhāpe meñ mujhe un kā sahārā na milā

ġham ke maare to hazāroñ hī zamāne meñ mile

mere jaisā koī taqdīr kā maarā na milā

ghuum aa.e haiñ jahāñ saarā magar aaj talak

aap ke jaisā hañsī koī dobāra na milā

apnī palkoñ ko bichhāyā tirī rāhoñ meñ magar

terī aamad kā koī dil ko ishārā na milā

mujh ko duniyā ne to nafrat ke sivā kuchh na diyā

mar hī jā.ūñgā agar pyaar tumhārā na milā

jo safīne ko kināre se lagā detā mire

haa.e qismat mujhe aisā koī dhārā na milā

hai ġhamoñ kā vo bhañvar jis meñ phañsā huuñ ai 'mukesh'

zindagī ko mirī ḳhushiyoñ kā kinārā na milā

apni qismat ki lakiron ko ishaara na mila

koi jugnu koi moti koi tara na mila

jin ka bachpan meri banhon mein hi guzra tha kabhi

is buDhape mein mujhe un ka sahaara na mila

gham ke mare to hazaron hi zamane mein mile

mere jaisa koi taqdir ka mara na mila

ghum aae hain jahan sara magar aaj talak

aap ke jaisa hansi koi dobara na mila

apni palkon ko bichhaya teri rahon mein magar

teri aamad ka koi dil ko ishaara na mila

mujh ko duniya ne to nafrat ke siwa kuchh na diya

mar hi jaunga agar pyar tumhaara na mila

jo safine ko kinare se laga deta mere

hae qismat mujhe aisa koi dhaara na mila

hai ghamon ka wo bhanwar jis mein phansa hun ai 'mukesh'

zindagi ko meri KHushiyon ka kinara na mila