apni qurbat ke sab aasar bhi lete jaana

apnī qurbat ke sab āsār bhī lete jaanā

ab jo jaao dar-o-dīvār bhī lete jaanā

chhoḌ kar jā hī rahe ho to phir apne hamrāh

saath rahne kā vo iqrār bhī lete jaanā

dukh to hogā magar ehsās ho kam-kam shāyad

jaate jaate mirā pindār bhī lete jaanā

be-ḳhudī mujh se mirī chhīn ke jaane vaale

āgahī ke kaḌe āzār bhī lete jaanā

jashn-e-āzādī-e-iz.hār meñ ai naġhmagaro

merī zanjīr kī jhankār bhī lete jaanā

un se milne kabhī jaao to ba-tarz-e-sauġhāt

mujh se mil kar mire ash'ār bhī lete jaanā

bazm-e-yārāñ nahīñ hākim kī 'adālat hai 'zahīr'

sar par ūñchī koī dastār bhī lete jaanā

apni qurbat ke sab aasar bhi lete jaana

ab jo jao dar-o-diwar bhi lete jaana

chhoD kar ja hi rahe ho to phir apne hamrah

sath rahne ka wo iqrar bhi lete jaana

dukh to hoga magar ehsas ho kam-kam shayad

jate jate mera pindar bhi lete jaana

be-KHudi mujh se meri chhin ke jaane wale

aagahi ke kaDe aazar bhi lete jaana

jashn-e-azadi-e-izhaar mein ai naghmagaro

meri zanjir ki jhankar bhi lete jaana

un se milne kabhi jao to ba-tarz-e-saughat

mujh se mil kar mere ash'ar bhi lete jaana

bazm-e-yaran nahin hakim ki 'adalat hai 'zahir'

sar par unchi koi dastar bhi lete jaana