apni sachchai ka aazar jo pale hue hain

apnī sachchā.ī kā āzār jo paale hue haiñ

ḳhud ko ham gardish-e-āfāt meñ Daale hue haiñ

band muTThī meñ jo ḳhushbū ko sambhāle hue haiñ

ye samajhte haiñ ki tūfān ko Taale hue haiñ

haiñ to ābād magar dar-badarī kī zad par

vo bhī merī hī tarah ghar se nikāle hue haiñ

apnī raftār se aage bhī nikal saktā huuñ

mujh pe kab haavī mire paañv ke chhāle hue haiñ

ab kisī bāb-e-samā.at pe na dastak deñge

dafn sahrā kī fazāoñ meñ jo naale hue haiñ

surḳh-rū jo hai vo merā koī ham-zād hai kyā

nok-e-neza pe vo sar kis kā uchhāle hue haiñ

un ke shāne haiñ har ik bār-e-garāñ se ḳhālī

ab vo dastār nahīñ sar ko sambhāle hue haiñ

vaz.a kā paas bhī rakhne ke rahe ahl kahāñ

ḳhud ko ham aur kisī sāñche meñ Dhāle hue haiñ

us kī ḳhushbū se tilismāt kā dar khulne lagā

dīda-o-dil qad-o-gesū ke havāle hue haiñ

apni sachchai ka aazar jo pale hue hain

KHud ko hum gardish-e-afat mein Dale hue hain

band muTThi mein jo KHushbu ko sambhaale hue hain

ye samajhte hain ki tufan ko Tale hue hain

hain to aabaad magar dar-badari ki zad par

wo bhi meri hi tarah ghar se nikale hue hain

apni raftar se aage bhi nikal sakta hun

mujh pe kab hawi mere panw ke chhaale hue hain

ab kisi bab-e-samaat pe na dastak denge

dafn sahra ki fazaon mein jo nale hue hain

surKH-ru jo hai wo mera koi ham-zad hai kya

nok-e-neza pe wo sar kis ka uchhaale hue hain

un ke shane hain har ek bar-e-garan se KHali

ab wo dastar nahin sar ko sambhaale hue hain

waza ka pas bhi rakhne ke rahe ahl kahan

KHud ko hum aur kisi sanche mein Dhaale hue hain

us ki KHushbu se tilismat ka dar khulne laga

dida-o-dil qad-o-gesu ke hawale hue hain