apni sunaen aap ki puchhen aapas ke gham dur karen

apnī sunā.eñ aap kī pūchheñ aapas ke ġham duur kareñ

chand ash.ār haiñ pesh-e-ḳhidmat aap agar manzūr kareñ

vus.at meñ kuchh farq nahīñ hai izzat ho yā rusvā.ī

donoñ duur talak le jaa.eñ donoñ hī mash.hūr kareñ

āshiq se mahbūb judā ho yā gul bichhḌe bulbul se

hijr ke sadme achchhe ḳhāse chehroñ ko be-nūr kareñ

jalva-ba-jalva hai vo nazar meñ aur vahī jab dil kā makīñ

kyoñ dohrā.eñ qissa-e-mūsā kyoñ phir zikr-e-tūr kareñ

aao paas hamāre baiTho tum jo ho vo samjhā.eñ

tum jo nahīñ ho vo bhī kah kar aur tumheñ maġhrūr kareñ

roz ye Thāneñ us kī galī meñ ab na kabhī rakkheñge qadam

kyā kiije gar dil ke taqāze rozāna majbūr kareñ

ham dānista tum ko bhulā.eñ tum mutavātir yaad karo

yuuñ duniyā-e-ishq meñ raa.ij ek nayā dastūr kareñ

apni sunaen aap ki puchhen aapas ke gham dur karen

chand ashaar hain pesh-e-KHidmat aap agar manzur karen

wusat mein kuchh farq nahin hai izzat ho ya ruswai

donon dur talak le jaen donon hi mashhur karen

aashiq se mahbub juda ho ya gul bichhDe bulbul se

hijr ke sadme achchhe KHase chehron ko be-nur karen

jalwa-ba-jalwa hai wo nazar mein aur wahi jab dil ka makin

kyon dohraen qissa-e-musa kyon phir zikr-e-tur karen

aao pas hamare baiTho tum jo ho wo samjhaen

tum jo nahin ho wo bhi kah kar aur tumhein maghrur karen

roz ye Thanen us ki gali mein ab na kabhi rakkhenge qadam

kya kije gar dil ke taqaze rozana majbur karen

hum danista tum ko bhulaen tum mutawatir yaad karo

yun duniya-e-ishq mein raij ek naya dastur karen