apni tanhaiyon pe rote hain

apnī tanhā.iyoñ pe rote haiñ

zaḳhm-e-dil roz apne dhote haiñ

yād-e-māzī ko zabt karte haiñ

aur kabhī hāl-e-ġham samote haiñ

vo tasavvur meñ mere haiñ har dam

jo mire paas bhī na hote haiñ

lamhe gin-gin ke din guzartā hai

raat bhar ham kabhī na sote haiñ

gir rahe haiñ jo mere dāmāñ par

qatre ḳhūn-e-jigar ke hote haiñ

koī samjhā.e jā ke un ko zarā

kyoñ vo tīr-e-sitam chubhote haiñ

na samajhte hue mire ġham ko

kashtī-e-ārzū Dubote haiñ

nazr karne ko kuchh nahīñ hai 'adā'

āñsuoñ kī laḌī pirote haiñ

apni tanhaiyon pe rote hain

zaKHm-e-dil roz apne dhote hain

yaad-e-mazi ko zabt karte hain

aur kabhi haal-e-gham samote hain

wo tasawwur mein mere hain har dam

jo mere pas bhi na hote hain

lamhe gin-gin ke din guzarta hai

raat bhar hum kabhi na sote hain

gir rahe hain jo mere daman par

qatre KHun-e-jigar ke hote hain

koi samjhae ja ke un ko zara

kyon wo tir-e-sitam chubhote hain

na samajhte hue mere gham ko

kashti-e-arzu Dubote hain

nazr karne ko kuchh nahin hai 'ada'

aansuon ki laDi pirote hain