apnon ka ye aalam kya kahiye milte hain to beganon ki tarah

apnoñ kā ye aalam kyā kahiye milte haiñ to begānoñ kī tarah

is daur meñ dil be-qīmat haiñ TuuTe hue paimānoñ kī tarah

parvāne to jal bujhte haiñ magar dil haiñ ki sulagte rahte haiñ

āsāñ to nahīñ jiite rahnā ham aise girāñ-jānoñ kī tarah

yā sham.a kī lo hī maddham hai yā sard hai dil kī aag abhī

sochā thā ki uḌ kar pahuñcheñge us bazm meñ parvānoñ kī tarah

tinkoñ ke safīne le le kar kyā kyā na muqābil aa.ī ḳhirad

ham ahl-e-junūñ raqsāñ hī rahe biphre hue tūfānoñ kī tarah

yā kaun-o-makāñ meñ ḳhvār hue yā kaun-o-makāñ kī ḳhair nahīñ

jiinā hai to insānoñ kī tarah marnā hai to insānoñ kī tarah

apnon ka ye aalam kya kahiye milte hain to beganon ki tarah

is daur mein dil be-qimat hain TuTe hue paimanon ki tarah

parwane to jal bujhte hain magar dil hain ki sulagte rahte hain

aasan to nahin jite rahna hum aise giran-jaanon ki tarah

ya shama ki lo hi maddham hai ya sard hai dil ki aag abhi

socha tha ki uD kar pahunchenge us bazm mein parwanon ki tarah

tinkon ke safine le le kar kya kya na muqabil aai KHirad

hum ahl-e-junun raqsan hi rahe biphre hue tufanon ki tarah

ya kaun-o-makan mein KHwar hue ya kaun-o-makan ki KHair nahin

jina hai to insanon ki tarah marna hai to insanon ki tarah