aqdar-e-kuhan hath se jaane nahin deta

aqdār-e-kuhan haath se jaane nahīñ detā

ghar us ke chale jaao to aane nahīñ detā

miltā hai magar haath milāne nahīñ detā

dīvār takalluf kī girāne nahīñ detā

mā'lūm nahīñ mujh se vo ḳhush hai ki ḳhafā hai

chehre pe koī rang hī aane nahīñ detā

tauhīn-e-‘adālat kī sazā us ko milī hai

jo 'adl ko suulī pe chaḌhāne nahīñ detā

tāriq kī qayādat ke talabgār to sab haiñ

kashtī hī koī aaj jalāne nahīñ detā

āsāñ to yahī hai ki uTho shahr jalāo

jangal meñ koī aag lagāne nahīñ detā

us shaḳhs se phal kī koī ummīd rakhe kyā

jo peḌ ke patte bhī uThāne nahīñ detā

'irfān' mire shahr kī galiyāñ haiñ bahut tang

dīvār koī apnī girāne nahīñ detā

aqdar-e-kuhan hath se jaane nahin deta

ghar us ke chale jao to aane nahin deta

milta hai magar hath milane nahin deta

diwar takalluf ki girane nahin deta

ma'lum nahin mujh se wo KHush hai ki KHafa hai

chehre pe koi rang hi aane nahin deta

tauhin-e-‘adalat ki saza us ko mili hai

jo 'adl ko suli pe chaDhane nahin deta

tariq ki qayaadat ke talabgar to sab hain

kashti hi koi aaj jalane nahin deta

aasan to yahi hai ki uTho shahr jalao

jangal mein koi aag lagane nahin deta

us shaKHs se phal ki koi ummid rakhe kya

jo peD ke patte bhi uThane nahin deta

'irfan' mere shahr ki galiyan hain bahut tang

diwar koi apni girane nahin deta