aql hairan hai rahmat ka taqaza kya hai

aql hairān hai rahmat kā taqāzā kyā hai

dil ko taqsīr kī tarġhīb tamāshā kyā hai

unheñ jab ġhaur se dekhā to na dekhā un ko

maqsad us parde kā ik dīda-e-bīnā kyā hai

ham shahādat kā junūñ sar meñ liye phirte haiñ

ham mujāhid haiñ hameñ maut kā khaTkā kyā hai

uḌtā phirtā huuñ maiñ sahrā meñ bagūle kī tarah

kuchh nahīñ ilm mirā maljā-o-māvā kyā hai

merā manshā hai ki duniyā se kinārā kar luuñ

ai ġham-e-dost batā terā irāda kyā hai

baat pur-pech hañsī lab pe shikan māthe par

dil samajhne se hai qāsir ye muamma kyā hai

jo tirī zulf pe jā kar na khile phuul vo kyā

jo na uljhe tire dāman se vo kāñTā kyā hai

ek khiltā huā gulshan hai tumhārā paikar

tum tabassum hī tabassum ho tumhārā kyā hai

maiñ ne ik baat jo pūchhī to bigaḌ kar bole

bad-gumānī ke sivā aap ne sīkhā kyā hai

vo faqīroñ ko navāzeñ na navāzeñ ai 'charḳh'

ham duā de ke chale ā.eñge apnā kyā hai

aql hairan hai rahmat ka taqaza kya hai

dil ko taqsir ki targhib tamasha kya hai

unhen jab ghaur se dekha to na dekha un ko

maqsad us parde ka ek dida-e-bina kya hai

hum shahadat ka junun sar mein liye phirte hain

hum mujahid hain hamein maut ka khaTka kya hai

uDta phirta hun main sahra mein bagule ki tarah

kuchh nahin ilm mera malja-o-mawa kya hai

mera mansha hai ki duniya se kinara kar lun

ai gham-e-dost bata tera irada kya hai

baat pur-pech hansi lab pe shikan mathe par

dil samajhne se hai qasir ye muamma kya hai

jo teri zulf pe ja kar na khile phul wo kya

jo na uljhe tere daman se wo kanTa kya hai

ek khilta hua gulshan hai tumhaara paikar

tum tabassum hi tabassum ho tumhaara kya hai

main ne ek baat jo puchhi to bigaD kar bole

bad-gumani ke siwa aap ne sikha kya hai

wo faqiron ko nawazen na nawazen ai 'charKH'

hum dua de ke chale aaenge apna kya hai