aql ke jal mein phansi hi nahin

aql ke jaal meñ phañsī hī nahīñ

zindagī aaj tak khulī hī nahīñ

mujh meñ jiitā rahā sadā koī

zindagī apnī maiñ ne jī hī nahīñ

saḳht itnī anā kī thī dīvār

phir kisī bhī tarah girī hī nahīñ

maiñ ne duniyā sameT lī to khulā

kaam kī koī chiiz thī hī nahīñ

chāñd ke saath ho ga.ī ruḳhsat

jaise vo is jahāñ kī thī hī nahīñ

jis se sairāb ruuh ho jaatī

aisī bārish kabhī huī hī nahīñ

saiñkaḌoñ zaḳhm haiñ zamāne ke

dil meñ yādoñ kī ik anī hī nahīñ

qaid āñkhoñ meñ hai bayābāñ bhī

ġham ke kuuze meñ ik nadī hī nahīñ

aql ke jal mein phansi hi nahin

zindagi aaj tak khuli hi nahin

mujh mein jita raha sada koi

zindagi apni main ne ji hi nahin

saKHt itni ana ki thi diwar

phir kisi bhi tarah giri hi nahin

main ne duniya sameT li to khula

kaam ki koi chiz thi hi nahin

chand ke sath ho gai ruKHsat

jaise wo is jahan ki thi hi nahin

jis se sairab ruh ho jati

aisi barish kabhi hui hi nahin

sainkaDon zaKHm hain zamane ke

dil mein yaadon ki ek ani hi nahin

qaid aankhon mein hai bayaban bhi

gham ke kuze mein ek nadi hi nahin