aql ne hum ko yun bhaTkaya rah na sake diwane bhi

aql ne ham ko yuuñ bhaTkāyā rah na sake dīvāne bhī

ābādī ko DhūñDne nikle kho baiThe vīrāne bhī

chashm-e-sāqī bhī nam hai lau dete haiñ paimāne bhī

tishna-labī ke sail-e-tapāñ se bach na sake maiḳhāne bhī

sang-e-jafā ko ḳhush-ḳhabarī do muzhda do zanjīroñ ko

shahr-e-ḳhirad meñ aa pahuñche haiñ ham jaise dīvāne bhī

ham ne jab jis dost ko bhī ā.īna dikhāyā maazī kā

hairāñ ho kar aks ne pūchhā aap mujhe pahchāne bhī

jism kī tishna-sāmānī se jism hī nā-āsūda nahīñ

TuuT ga.e is zad par aa kar ruuh ke tāne-bāne bhī

andeshe aur bazm-e-jānāñ daar kā zikr aur itnā sukūt

dīvānoñ ke bhes meñ shāyad aa pahuñche farzāne bhī

aql ne hum ko yun bhaTkaya rah na sake diwane bhi

aabaadi ko DhunDne nikle kho baiThe virane bhi

chashm-e-saqi bhi nam hai lau dete hain paimane bhi

tishna-labi ke sail-e-tapan se bach na sake maiKHane bhi

sang-e-jafa ko KHush-KHabari do muzhda do zanjiron ko

shahr-e-KHirad mein aa pahunche hain hum jaise diwane bhi

hum ne jab jis dost ko bhi aaina dikhaya mazi ka

hairan ho kar aks ne puchha aap mujhe pahchane bhi

jism ki tishna-samani se jism hi na-asuda nahin

TuT gae is zad par aa kar ruh ke tane-bane bhi

andeshe aur bazm-e-jaanan dar ka zikr aur itna sukut

diwanon ke bhes mein shayad aa pahunche farzane bhi