aql to kahti hai ab ke us se achchha DhunD lun

aql to kahtī hai ab ke us se achchhā DhūñD luuñ

hai magar dil kī ye zid phir us ke jaisā DhūñD luuñ

is se mere pyaas kī shiddat meñ aa.egī kamī

meñ agar ḳhud se ziyāda koī pyāsā DhūñD luuñ

ai ḳhudā jo ho tire donoñ jahānoñ se alag

tū ijāzat de to koī aur duniyā DhūñD luuñ

ḳhud-kushī aur zindagī meñ se agar chunñā paḌe

ain-mumkin hai maiñ koī aur rasta DhūñD luuñ

is se pahle ki mire khone kī ḳhabreñ aam huuñ

merī koshish hai ki maiñ ḳhud ko dobāra DhūñD luuñ

aur kitnī der hai iisā ki aane meñ abhī

kyā maiñ jab tak ke liye koī masīhā DhūñD luuñ

aql to kahti hai ab ke us se achchha DhunD lun

hai magar dil ki ye zid phir us ke jaisa DhunD lun

is se mere pyas ki shiddat mein aaegi kami

mein agar KHud se ziyaada koi pyasa DhunD lun

ai KHuda jo ho tere donon jahanon se alag

tu ijazat de to koi aur duniya DhunD lun

KHud-kushi aur zindagi mein se agar chunna paDe

ain-mumkin hai main koi aur rasta DhunD lun

is se pahle ki mere khone ki KHabren aam hun

meri koshish hai ki main KHud ko dobara DhunD lun

aur kitni der hai isa ki aane mein abhi

kya main jab tak ke liye koi masiha DhunD lun