aqlim-e-dil pe ishq ki farman-rawaiyan

aqlīm-e-dil pe ishq kī farmāñ-ravā.iyāñ

jāñ-baḳhsh qurbateñ kahīñ qātil judā.iyāñ

suulī chaḌhā koī koī ġharqāb ho gayā

kyā kyā vafā se hotī rahīñ bevafā.iyāñ

luTtī hai qaid-e-zulf meñ kyā kyā bahār-e-husn

tah meñ asīrīyoñ kī haiñ kyā kyā rihā.iyāñ

zāt-e-bashar hazār girohoñ meñ baT ga.ī

gumrāh aur kar ga.iiñ kuchh rah-numā.iyāñ

nādāriyoñ meñ sabr kī ne.amat se the ġhanī

daulat baḌhī to baḌh ga.iiñ be-e.atinā.iyāñ

be-pardagī se uḌ gayā sharm-o-hayā kā rañg

chehre pe uḌ rahī haiñ hayā ke havā.iyāñ

ausāf dekhnā hoñ to auroñ ke dekh 'shād'

ojhal haiñ terī aañkh se terī burā.iyāñ

aqlim-e-dil pe ishq ki farman-rawaiyan

jaan-baKHsh qurbaten kahin qatil judaiyan

suli chaDha koi koi gharqab ho gaya

kya kya wafa se hoti rahin bewafaiyan

luTti hai qaid-e-zulf mein kya kya bahaar-e-husn

tah mein asiriyon ki hain kya kya rihaiyan

zat-e-bashar hazar girohon mein baT gai

gumrah aur kar gain kuchh rah-numaiyan

nadariyon mein sabr ki neamat se the ghani

daulat baDhi to baDh gain be-eatinaiyan

be-pardagi se uD gaya sharm-o-haya ka rang

chehre pe uD rahi hain haya ke hawaiyan

ausaf dekhna hon to auron ke dekh 'shad'

ojhal hain teri aankh se teri buraiyan