are aaftab teri qasam tera husn paya hai chand ne

are āftāb tirī qasam tirā husn paayā hai chāñd ne

baḌī duur se baḌī der tak tujhe ḳhuub dekhā hai chāñd ne

jo bhaTak sake na idhar udhar jo madār se nahīñ haT sake

tū zamīn hai jise zāviyoñ meñ jakaḌ ke rakkhā hai chāñd ne

mirā vahm hī ho bhale magar mujhe ab bhī lagtā hai dostā

sabhī āb-o-tāb ko chhoḌ kar kisī din dhḌaknā hai chāñd ne

vo jo raaz tū ne kahā thā chāñdnī shab meñ chāñd se ek din

tirā raaz raaz rahā nahīñ mujhe sab batāyā hai chāñd ne

vo jo ik sitārā girā thā dāman-e-'arsh se baḌī der qabl

mirī aañkh meñ thā rukā huā use ghar bulāyā hai chāñd ne

are aaftab teri qasam tera husn paya hai chand ne

baDi dur se baDi der tak tujhe KHub dekha hai chand ne

jo bhaTak sake na idhar udhar jo madar se nahin haT sake

tu zamin hai jise zawiyon mein jakaD ke rakkha hai chand ne

mera wahm hi ho bhale magar mujhe ab bhi lagta hai dosta

sabhi aab-o-tab ko chhoD kar kisi din dhDakna hai chand ne

wo jo raaz tu ne kaha tha chandni shab mein chand se ek din

tera raaz raaz raha nahin mujhe sab bataya hai chand ne

wo jo ek sitara gira tha daman-e-'arsh se baDi der qabl

meri aankh mein tha ruka hua use ghar bulaya hai chand ne