are Darte ho kyon ahl-e-muhabbat kuchh nahin hoga

are Darte ho kyoñ ahl-e-muhabbat kuchh nahīñ hogā

nahīñ aane lagī koī qayāmat kuchh nahīñ hogā

du'āoñ kī hasīñ chhatrī tale be-ḳhauf baiThe haiñ

ki Tal jā.egī ik din har musībat kuchh nahīñ hogā

mire hoñToñ pe rakkhī aag chun lo apne hoñToñ se

bas is meñ chāhiye thoḌī sī himmat kuchh nahīñ hogā

ba-qaid-e-hosh rahnā to mirā mumkin nahīñ yuuñ bhī

banā Daalo mujhe tasvīr-e-vahshat kuchh nahīñ hogā

mire mālik bas itnī sī hai tujh se iltijā merī

'atā kar de mujhe us kī rifāqat kuchh nahīñ hogā

ruko ham apnī sairābī kā kuchh sāmān to kar leñ

tumheñ jaane kī de deñge ijāzat kuchh nahīñ hogā

koī āñchal se mustaġhnī huā baiThā hai ai 'yāvar'

utaar aur pheñk de tauq-e-sharāfat kuchh nahīñ hogā

are Darte ho kyon ahl-e-muhabbat kuchh nahin hoga

nahin aane lagi koi qayamat kuchh nahin hoga

du'aon ki hasin chhatri tale be-KHauf baiThe hain

ki Tal jaegi ek din har musibat kuchh nahin hoga

mere honTon pe rakkhi aag chun lo apne honTon se

bas is mein chahiye thoDi si himmat kuchh nahin hoga

ba-qaid-e-hosh rahna to mera mumkin nahin yun bhi

bana Dalo mujhe taswir-e-wahshat kuchh nahin hoga

mere malik bas itni si hai tujh se iltija meri

'ata kar de mujhe us ki rifaqat kuchh nahin hoga

ruko hum apni sairabi ka kuchh saman to kar len

tumhein jaane ki de denge ijazat kuchh nahin hoga

koi aanchal se mustaghni hua baiTha hai ai 'yawar'

utar aur phenk de tauq-e-sharafat kuchh nahin hoga