arman ko chhupane se musibat mein hai jaan aur

armāñ ko chhupāne se musībat meñ hai jaañ aur

sho.ale ko dabāte haiñ to uThtā hai dhuāñ aur

inkār kiye jaao isī taur se haañ aur

hoñToñ pe hai kuchh aur nigāhoñ se ayaañ aur

ḳhud tū ne baḌhā.ī hai ye tafrīq-e-jahāñ aur

tū ek magar ruup yahāñ aur vahāñ aur

dil meñ koī ġhuncha kabhī khilte nahīñ dekhā

is baaġh meñ kyā aa ke banā legī ḳhizāñ aur

itnā bhī mire ahd-e-vafā par na karo shak

haañ haañ maiñ samajhtā huuñ ki hai rasm-e-jahāñ aur

har lab pe tirā naam hai ik maiñ huuñ ki chup huuñ

duniyā kī zabāñ aur hai āshiq kī zabāñ aur

ab koī sadā merī sadā par nahīñ detā

āvāz-e-tarab aur thī āvāz-e-fuġhāñ aur

kuchh duur pe miltī haiñ hadeñ arz-o-samā kī

sahrā-e-talab meñ nahīñ manzil kā nishāñ aur

ik aah aur ik ashk pe hai qissa-e-dil ḳhatm

rakhtī nahīñ alfāz-e-mohabbat kī zabāñ aur

vo sub.h ke taare kī jhapakne sī lagī aañkh

kuchh der zarā dīda-e-anjum-nigarāñ aur

'mullā' vahī tum aur vahī kū-e-hasīnāñ

jaise kabhī duniyā meñ na thā koī javāñ aur

arman ko chhupane se musibat mein hai jaan aur

shoale ko dabaate hain to uThta hai dhuan aur

inkar kiye jao isi taur se han aur

honTon pe hai kuchh aur nigahon se ayan aur

KHud tu ne baDhai hai ye tafriq-e-jahan aur

tu ek magar rup yahan aur wahan aur

dil mein koi ghuncha kabhi khilte nahin dekha

is bagh mein kya aa ke bana legi KHizan aur

itna bhi mere ahd-e-wafa par na karo shak

han han main samajhta hun ki hai rasm-e-jahan aur

har lab pe tera nam hai ek main hun ki chup hun

duniya ki zaban aur hai aashiq ki zaban aur

ab koi sada meri sada par nahin deta

aawaz-e-tarab aur thi aawaz-e-fughan aur

kuchh dur pe milti hain haden arz-o-sama ki

sahra-e-talab mein nahin manzil ka nishan aur

ek aah aur ek ashk pe hai qissa-e-dil KHatm

rakhti nahin alfaz-e-mohabbat ki zaban aur

wo subh ke tare ki jhapakne si lagi aankh

kuchh der zara dida-e-anjum-nigaran aur

'mulla' wahi tum aur wahi ku-e-hasinan

jaise kabhi duniya mein na tha koi jawan aur