arman nikal jaen arman-bhare dil ke

armān nikal jaa.eñ armān-bhare dil ke

hāsil hoñ maze phir se saaqī tirī mahfil ke

mañjdhār meñ jākar bhī ham Duub nahīñ sakte

tūfān meñ ḳhush hoñge maare hue sāhil ke

vo naza.a ke vaqt aa.e lab hil na sake apne

afsos rahe dil meñ armān the jo dil ke

ġhairoñ ko bhare sāġhar ham qatre ko bhī tarseñ

andāz nirāle haiñ saaqī tirī mahfil ke

kahte haiñ bahār aa.ī kyā ḳhaak bahār aa.ī

naqshe haiñ vahī ab bhī afsurdagi-e-dil ke

ab qurbat-e-sāhil kā armān nahīñ baaqī

vo lutf liye dil ne kuchh dūrī-e-sāhil ke

jalvat meñ jise aa.e ḳhalvat kā maza 'sāhir'

andāz use bhā.eñ kyā garmi-e-mahfil ke

arman nikal jaen arman-bhare dil ke

hasil hon maze phir se saqi teri mahfil ke

manjdhaar mein jakar bhi hum Dub nahin sakte

tufan mein KHush honge mare hue sahil ke

wo naza ke waqt aae lab hil na sake apne

afsos rahe dil mein arman the jo dil ke

ghairon ko bhare saghar hum qatre ko bhi tarsen

andaz nirale hain saqi teri mahfil ke

kahte hain bahaar aai kya KHak bahaar aai

naqshe hain wahi ab bhi afsurdagi-e-dil ke

ab qurbat-e-sahil ka arman nahin baqi

wo lutf liye dil ne kuchh duri-e-sahil ke

jalwat mein jise aae KHalwat ka maza 'sahir'

andaz use bhaen kya garmi-e-mahfil ke