arz-e-talab ki hum ko ijazat kahan hai ab

arz-e-talab kī ham ko ijāzat kahāñ hai ab

girvī qalam hai aur muqaffal zabāñ hai ab

rokā gayā qalam ko to tesha banā liyā

har lafz tiir aur ye lab ik kamāñ hai ab

ham be-ḳhudī meñ tark-e-tamannā tak aa ga.e

ab fikr-e-dil nahīñ hai na tashvīsh-e-jāñ hai ab

ye hijr hai ki vasl ki duurī hai yā hai qurb

kyā silsila ye tere mire darmiyāñ hai ab

yuuñ thā ki jo bhī rut thī kalām-o-suḳhan kī thī

yuuñ hai bas ek mausam-e-āh-o-fuġhāñ hai ab

phūñke haiñ ḳhvāb rātoñ ke bujhte alaav meñ

āñkhoñ meñ kuchh nahīñ hai dhuāñ hī dhuāñ hai ab

har ik qadam pe koī bharam TūTtā gayā

apne yaqīñ kā ham ko faqat ik gumāñ hai ab

qisse purāne ho ga.e rāñjhā ke qais ke

sab kī zabāñ pe merī na.ī dāstāñ hai ab

maiñ āḳhirī diyā huuñ siyah-baḳht raat kā

mere hī dam se mehr-o-vafā kā nishāñ hai ab

arz-e-talab ki hum ko ijazat kahan hai ab

girwi qalam hai aur muqaffal zaban hai ab

roka gaya qalam ko to tesha bana liya

har lafz tir aur ye lab ek kaman hai ab

hum be-KHudi mein tark-e-tamanna tak aa gae

ab fikr-e-dil nahin hai na tashwish-e-jaan hai ab

ye hijr hai ki wasl ki duri hai ya hai qurb

kya silsila ye tere mere darmiyan hai ab

yun tha ki jo bhi rut thi kalam-o-suKHan ki thi

yun hai bas ek mausam-e-ah-o-fughan hai ab

phunke hain KHwab raaton ke bujhte alaw mein

aankhon mein kuchh nahin hai dhuan hi dhuan hai ab

har ek qadam pe koi bharam TuTta gaya

apne yaqin ka hum ko faqat ek guman hai ab

qisse purane ho gae ranjha ke qais ke

sab ki zaban pe meri nai dastan hai ab

main aaKHiri diya hun siyah-baKHt raat ka

mere hi dam se mehr-o-wafa ka nishan hai ab