asar kiya lab-e-KHamosh ne zaban ki tarah

asar kiyā lab-e-ḳhāmosh ne zabāñ kī tarah

bikhar gayā mirā har ashk dāstāñ kī tarah

kiye haiñ tū ne sitam jaur-e-āsmāñ kī tarah

jo imtihān liye mujh se imtihāñ kī tarah

kahāñ Thikāna banā.ūñgā apnā ai sayyād

qafas bhī raas na aaya jo āshiyāñ kī tarah

shab-e-visāl hai jī bhar ke muskurāne do

bahār aa.ī chaman meñ mire ḳhizāñ kī tarah

mirī to gardish-e-pā hai azal se qismat meñ

zamīñ bhī ghūmtī hai daur-e-āsmāñ kī tarah

kahīñ pe manzil-e-āshiq safar meñ ḳhud to nahīñ

nazar meñ rahtī hai kyoñ bahr-e-bekarāñ kī tarah

kahūñ to kaise kahūñ un se hāl-e-dil ai 'prem'

zabān rakhtā huuñ jab apnī be-zabāñ kī tarah

asar kiya lab-e-KHamosh ne zaban ki tarah

bikhar gaya mera har ashk dastan ki tarah

kiye hain tu ne sitam jaur-e-asman ki tarah

jo imtihan liye mujh se imtihan ki tarah

kahan Thikana banaunga apna ai sayyaad

qafas bhi ras na aaya jo aashiyan ki tarah

shab-e-visal hai ji bhar ke muskurane do

bahaar aai chaman mein mere KHizan ki tarah

meri to gardish-e-pa hai azal se qismat mein

zamin bhi ghumti hai daur-e-asman ki tarah

kahin pe manzil-e-ashiq safar mein KHud to nahin

nazar mein rahti hai kyon bahr-e-bekaran ki tarah

kahun to kaise kahun un se haal-e-dil ai 'prem'

zaban rakhta hun jab apni be-zaban ki tarah