asar mein aata gaya main teri saKHawat ke

asar meñ aatā gayā maiñ tirī saḳhāvat ke

darāz hote ga.e haath merī hājat ke

laboñ pe mauja-e-nik.hat yuñhī nahīñ raqsāñ

khile haiñ phuul mire dil meñ terī chāhat ke

tapish kuchh aisī thī ḳhurshīd-e-istaqāmat kī

pasīne chhūT ga.e sho'la-e-'adāvat ke

ye bāt-bāt meñ tark-e-ta'alluqāt kī baat

batāo kyā yahī ādāb haiñ mohabbat ke

hameñ bhī baḳhsh sukūñ aa kabhī idhar bhī aa

ki ham bhī haiñ mutamannī tirī ziyārat ke

navāzisheñ tirī haa.il agar nahīñ hotīñ

to ham bhī karte nazāre sukūn-o-rāhat ke

damak rahe haiñ jo dāman pe ban ke lā'l-o-guhar

'habīb' ashk haiñ dar-asl vo nadāmat ke

asar mein aata gaya main teri saKHawat ke

daraaz hote gae hath meri hajat ke

labon pe mauja-e-nikhat yunhi nahin raqsan

khile hain phul mere dil mein teri chahat ke

tapish kuchh aisi thi KHurshid-e-istaqamat ki

pasine chhuT gae sho'la-e-'adawat ke

ye baat-baat mein tark-e-ta'alluqat ki baat

batao kya yahi aadab hain mohabbat ke

hamein bhi baKHsh sukun aa kabhi idhar bhi aa

ki hum bhi hain mutamanni teri ziyarat ke

nawazishen teri hail agar nahin hotin

to hum bhi karte nazare sukun-o-rahat ke

damak rahe hain jo daman pe ban ke la'l-o-guhar

'habib' ashk hain dar-asl wo nadamat ke