ashjar dast-basta sajde mein jhukte sae

ashjār dast-basta sajde meñ jhukte saa.e

ye kaun idhar se guzrā ḳhushbū havā se aa.e

dil-sahn se uThā hai ik intizār jab se

ḳhālī makāñ meñ ḳhālī din jaa.e raat jaa.e

ik dard be-karāñ sā bahtā hai dil kī jānib

bolūñ to lahr uTThe varna sukūt chhā.e

is daf.a bādaloñ meñ chehre na.e bane haiñ

mumkin hai bārishoñ kā mausam bhī raas aa.e

muddat ke baad us ne milne kā dam bharā hai

dhaḌkā lagā hai phir se mausam badal na jaa.e

takte haiñ āsmāñ se kuchh ḳhvāb an-chhue se

thak haar ke parinda jab ghar ko lauT aa.e

lagne lagā thā qissa be-rabt be-sabab sā

sab sun rahe the 'mīrā' ham hī sunā na paa.e

ashjar dast-basta sajde mein jhukte sae

ye kaun idhar se guzra KHushbu hawa se aae

dil-sahn se uTha hai ek intizar jab se

KHali makan mein KHali din jae raat jae

ek dard be-karan sa bahta hai dil ki jaanib

bolun to lahr uTThe warna sukut chhae

is dafa baadalon mein chehre nae bane hain

mumkin hai barishon ka mausam bhi ras aae

muddat ke baad us ne milne ka dam bhara hai

dhaDka laga hai phir se mausam badal na jae

takte hain aasman se kuchh KHwab an-chhue se

thak haar ke parinda jab ghar ko lauT aae

lagne laga tha qissa be-rabt be-sabab sa

sab sun rahe the 'mira' hum hi suna na pae