ashk aankhon ke liye hai aur gham dil ke liye

ashk āñkhoñ ke liye hai aur ġham dil ke liye

ik samundar ke liye hai ek sāhil ke liye

ham-safar azm-e-safar ho to safar āsān hai

rāste ḳhud rāsta dete haiñ manzil ke liye

hal huī mushkil mirī yuuñ jaise mushkil hī na thī

dī sadā mushkil-kushā ko jab bhī mushkil ke liye

mas.ale hī mas.ale haiñ jis taraf bhī jā.iye

log sanjīda nahīñ shāyad masā.il ke liye

sab ko bairūnī ujāloñ hī kī ḳhvāhish hai yahāñ

māñgtā koī nahīñ ab raushnī dil ke liye

is qadar ehsās ġhurbat kā nahīñ hotā hameñ

gar hamāre paas hotā kuchh bhī saa.il ke liye

ḳhvāhishoñ ke hasratoñ ke aarzū ke dard ke

saiñkaḌoñ mausam bane 'rāhat' mire dil ke liye

ashk aankhon ke liye hai aur gham dil ke liye

ek samundar ke liye hai ek sahil ke liye

ham-safar azm-e-safar ho to safar aasan hai

raste KHud rasta dete hain manzil ke liye

hal hui mushkil meri yun jaise mushkil hi na thi

di sada mushkil-kusha ko jab bhi mushkil ke liye

masale hi masale hain jis taraf bhi jaiye

log sanjida nahin shayad masail ke liye

sab ko bairuni ujalon hi ki KHwahish hai yahan

mangta koi nahin ab raushni dil ke liye

is qadar ehsas ghurbat ka nahin hota hamein

gar hamare pas hota kuchh bhi sail ke liye

KHwahishon ke hasraton ke aarzu ke dard ke

sainkaDon mausam bane 'rahat' mere dil ke liye